Веб-сайттағы электрондық қорлар каталогының таныстырылымы
2014 жылдың 19 желтоқсанында БҚО мемлекеттік мұрағатының оқу залында облыстың бұқаралық ақпарат құралдары өкілдерінің қатысуымен және облыстық мәдениет, мұрағаттар және құжаттама басқармасының басшысы Д.А.Құсайыновтың жетекшілігімен облыстық мұрағат веб-сайтының таныстырылымы өтті.
Шақырылғандардың қатарында Қазақстан-Орал, ТДК 42 телеарнасының өкілдері, сонымен қатар, облыс және қаланың мерзімді баспасөз қызметі өкілдері қатысты.
Таныстырылымды аша отырып, БҚО мәдениет, мұрағаттар және құжаттама басқармасының басшысы Д.А.Құсайынов мұрағаттық мекемелер мен мұрағаттардың сақтауынан табылатын ауқымды құндылықтардың мемлекеттің қоғамдық өміріндегі мәні мен маңызы және олар қоғамға қызмет ету, мемлекеттік саясатты іске асыру және қазақстандық отаншылдықты қалыптастыруда зор үлестерін қосатыны туралы атап өтті.
Таныстырылымды өткізу шеңберінде БҚО мемлекеттік мұрағатының директоры А.Н.Савгабаева осы бағытта атқарылған жұмыстар туралы баяндап, көпшіліктің назарына автоматтандырылған іздеу функциясы бар электронды қорлар каталогымен жабдықталған мұрағат веб-сайтымен таныстырып өтті.
Өз сөзінде А.Савгабаева былай деді: «Мұрағаттың сайтында республика көлеміндегі басқа мұрағаттардың веб-сайттарымен салыстырғанда өзіндік ерекшеліктер мен артықшылықтары бар. Бұл бірегей және республика көлеміндегі ешбір мұрағатта баламасы жоқ жоба және де ресейлік әріптестердің тәжірибесі негізінде жасақталған.
Пайдаланушылардың тек қана мұрағат туралы анықтамалық ақпарат алғанымен қоймай, мұрағатта сақталатын құжаттар құрамымен танысуға мүмкіндіктері болады.
Ол үшін сайтта қорлардың электронды каталогы жасақталып орналастырылған, каталог автоматтандырылған іздеу функциясымен жабдықталған. Іздеудің параметрлерінің де көлемі кең - пайдаланушы қажетті ақпаратты мұрағаттық шифр, нақты сөз немесе оқиға мен құжаттың жылы, айы, күні бойынша іздей алады.
Сайттың тағы да бір ерекшелігі – шағын электронды кітапханасы. Сайттың «Басылымдар, шығарылымдар» модулінде мұрағаттың оқу залында ең көп сұранысқа ие болған кітаптардың сканерленген флеш-нұсқалары орналасқан. Осыған қоса, мұрағатта сақталған метрикалық кітаптар мен көне газеттер жинағы жариялана бастады».
Таныстырылым аяқталған соң қысқаша брифинг өтті, мұнда тілшілердің сұрақтарына басқарма басшысының орынбасары В.А.Иночкин мен мұрағат директоры А.Н.Савгабаева оларға толыққанды жауаптар берді.
Таныстырылым шеңберінде облыстық мұрағаттың сақтауындағы 1941-1945 жылдардағы Ұлы Отан соғысы туралы баяндайтын мұрағаттық құжаттардың көрмесі ұйымдастырылды және мұрағат қоймаларымен таныстырылып, экскурсия оздырылды.
Зерттеушілермен жұмыс және ақпараттық технологиялар бөлімінің басшысы А.Искакова
19.12.2014 жыл
1941-1945 жылдардағы ҰОС туралы баяндайтын мұрағаттық құжаттардың көрмесі
Веб-сайттағы электрондық қорлар каталогының таныстырылымы
Мұрағат қоймаларына экскурсия
