КЕҢЕС ОДАҒЫНЫҢ БАТЫРЫ ЖАҚСЫҒҰЛОВ САДЫҚ ШАКЕЛҰЛЫНЫҢ ДҮНИЕГЕ КЕЛГЕНІНЕ 100 ЖЫЛ!
КЕҢЕС ОДАҒЫНЫҢ БАТЫРЫ ЖАҚСЫҒҰЛОВ САДЫҚ ШАКЕЛҰЛЫНЫҢ ДҮНИЕГЕ КЕЛГЕНІНЕ 100 ЖЫЛ!
Кеңес Одағының батыры Жақсығұлов Садық Шәкелұлының 100 жыл толу құрметіне, Сізге оның өмірі мен қызметіне қатысты құжаттардың электрондық көрмесін ұсынамыз.
Жақсығұлов Садық Шәкелұлы 1924 жылы 7 қарашада Қазақ КСР Орал облысы Жаңақала ауданы №20-шы ауылдық кеңесте дүниеге келген. 1941 жылға дейін май зауытында жұмыс істеген. 18 жасында майданға сұранып, Курск иініндегі сұрапыл шайқасқа қатысқан. Осы жерде қайсарлығымен көзге түсіп, «Ерлігі үшін» медаліне ие болды. Ал Днепрден жеделдетіп өту кезінде майдандастары оны «жеңілмейтін сержант» атап кеткен. Днепр өзенін алғашқылар сапында өтіп, жау техникасы мен адам күштерін шығынға ұшыратып, қаруластарының өзеннен өтуін қамтамасыз еткені үшін миномент расчетының сержанты Жақсығұловқа «Батыр» атағы берілген. Соғыстан кейін ауылдағы партия бөлімшесінде қызмет етіп, ардагер бес баланы өсіріп-өндірді. Батырдың есімі Каменка ауылындағы орта мектепке көзі тірісінде берілді.
Европаның біраз жерін фашизмнен азат етуге қатысқан Батыр жеңіс күнін Австрия жерінде қарсы алған. Елге оралғаннан кейін көп жыл партия, Кеңес органдарында басшы қызметін атқарған. Өмірінің соңғы жылдарында аудандық ардагерлер кеңесінің төрағасы болып қызмет атқарды. Тасқала ауданының Құрметті азаматы атағын алған.
1932-1940 жылдары толық емес орта мектепте оқыды.
1941-1942 жылдары – №500-ші қой совхозы жанындағы толық емес орта мектепті тәмамдады.
1941-1942 жылдары – Камен ауданы №500-ші қой совхозында жұмысшы болды.
1942 жылдың қыркүйегінде жұмысшы-шаруалардың Қызыл Армиясы қатарына алынды.
1942-1946 жылдары – Кеңес Армиясы қатарында болды.
1946-1948 жылдары – Камен ауданы І-ші Чижа ауылдық кеңесінің төрағасы.
1948-1952 жылдары – Камен аудандық әлеуметтік қамсыздандыру бөлімінің меңгерушісі.
1952-1954 жылдары – Камен аудандық партия комитетінің нұсқаушысы.
1954-1957 жылдары – Камен аудандық партия комитетінің Семиглаво-Мар МТС-нің колхоздар бойынша нұсқаушысы.
1957-1960 жылдары – Қазақстан КП ОК жанындағы Шымкент облысаралық кеңестік-партия мектебінің тыңдаушысы.
1960-1962 жылдары – Камен аудандық партия комитеті ұйымдастыру бөлімінің меңгерушісі.
1962-1963 жылдары – Камен аудандық еңбекші-депутаттар кеңесі атқару комитеті төрағасының орынбасары.
1963-1965 жылдары – Зеленов өндірістік басқармасы партия комитетінің инспектор-ұйымдастырушысы.
1965-1967 жылдары – Зеленов ауданы Ленин атындағы совхозда бастауыш партия ұйымының хатшысы.
1967-1973 жылдары – Камен аудандық еңбекші-депутаттар кеңесі атқару комитеті төрағасының орынбасары.
1976 жылдан бері Тасқала ауданында Жақсығұлов Садық Шәкелұлының атына қазақ күресінен дәстүрлі түрде республикалық турнир өтіп келеді.
Көрменің негізгі мақсаты: Кеңес Одағының батыры С.Ш.Жақсығұловқа 100 жыл толуына орай өмірі мен қызметін оқырман қауымға таныстыру.
Міндеттері:
- өлке тарихын зерттеудің дереккөзі ретінде архивтік құжаттарды ұсыну;
- С.Ш.Жақсығұловтың өмірбаянымен таныстыру;
- өлке тарихына құрмет сезімін қалыптастыру.
ФОТОСУРЕТІ
БҚО МА, П 37-қор, 20-тізім, 458-іс, 24-бума, 2-бет
Өмірбаяны туралы деректер, 22 мамыр 1945 жыл, машинкамен басылған, орыс тілінде
БҚО МА, 39 ОЦ-қор, 1-тізім, 8-іс, 1-бума, 20-бет
Жеке іс-қағазы
Еңбек жолы деректері, 4 қыркүйек 1957 жыл, машинкамен басылған, орыс тілінде
БҚО МА, 39 ОЦ-қор, 1-тізім, 8-іс, 1-бума, 14-15-бет
